“Kryetarit Veliu i dështon për herë të tretë ndërtimi i sheshit të dëshmorëve, pritet dyfishim i tepricës buxhetore”.

Kështu ka bërë te ditur këshilltari komunal nga radhët e Vetëvendosjes në komunën e Podujevës, Fitim Mucolli.

Mucolli përmes një postimi në Facebook ka shkruar se duhet ngritur alarm për këtë dështim.

“Sheshi i dëshmorëve në komunën e Podujevës ka dështuar për herë të tretë, e kjo është më shumë se shqetësuese. Duhet ngritet menjëherë alarm për papërgjegjshmërinë e komunës në këtë projekt të rëndësishëm. Ky dështim i cili po ndodhë për të tretin vit radhazi do të ndikojë që rreth 4 milionë euro të mbesin tepricë buxhetore që është dyfishi i asaj që është investuar këtë vit në komunë”, ka shkruar Mucolli.

Ai po ashtu ka shtuar se këtë vit pritet të mbesin rreth 4 milionë euro tepricë buxhetore.

“Aktualisht janë shpenzuar vetëm 2 milionë e 961 mijë euro nga 6 milionë e 701 mijë sa ishin të planifikuara. Edhe vitin e kaluar Vetëvendosje ka ngritur këtë shqetësim, taksat e qytetarëve të Podujevës po keq menaxhohen, ato nuk po shkojnë në investimet e nevojshme edhe ato pak investime janë të orientuara në mënyrë të gabuar”, ka shkruar ai.

Ndryshe, Mucolli të njëjtin problem e ka ngritur edhe vitin që lamë pas. Ai ka kritikuar qeverisjen e komunës së Podujevës për keq menaxhim dhe tepricë të madhe të buxhetit teksa ka shtuar se komuna na qindra probleme që kërkojnë zgjidhje të menjëhershme./arbresh.info/